Uaminifu kwa Watu Wengine: Msingi wa Mahusiano na Maendeleo.

Picha kwa hisani ya mtandao

Uaminifu kwa Watu Wengine: Msingi wa Mahusiano na Maendeleo

Katika maisha, kila mmoja wetu anajengwa na mahusiano. Mahusiano ya kifamilia, kazini, kifedha, kijamii na kirafiki. Lakini jambo ambalo linashikilia mahusiano hayo yote yasitetereke ni uaminifu. Kama binadamu, hatuwezi kuishi kwa kujitegemea kikamilifu bila kutegemea watu wengine. Tunaishi kwa kutegemeana, kwa kuaminiana, kwa kusaidiana. Ndiyo maana uaminifu kwa watu wengine ni moja ya silaha kubwa sana ya mafanikio ya kudumu.

Katika dunia ya leo iliyojaa tamaa, hila na ubinafsi, watu waaminifu wamekuwa adimu sana. Lakini bado wanahitajika sana. Dunia inalia kwa kiu ya watu wanaosema wanachomaanisha, wanaotekeleza walichoahidi, wanaolinda siri, wanaojali hisia za wengine, wanaojenga badala ya kubomoa, na wanaojali mali na rasilimali za watu wengine.

Kwa Nini Uaminifu kwa Wengine Ni Muhimu?

Watu hukumbuka kwa muda mrefu sana jinsi ulivyowafanya kujisikia. Siyo tu kile ulichofanya—bali hali waliyobaki nayo mioyoni mwao baada ya kushughulika nawe. Uaminifu ni msingi wa hali hiyo. Ukiwa mwaminifu, watu hujiona na kujisikia salama, wanafurahia kukuamini, na wanaona thamani ya uwepo wako katika maisha yao.

Watu wanapokupima, hawatathmini tu uwezo wako, bali pia tabia zako. Unaweza kuwa na elimu kubwa, vipaji vikubwa, au maarifa ya kipekee, lakini ikiwa huna sifa ya uaminifu, watu hawatakukaribisha kwenye nafasi nyeti. Mara nyingi, fursa huambatana na imani. Na imani hujengwa juu ya uaminifu na iman i hulipwa kwa imani.

Uaminifu Unadhihirika Wapi?

Uaminifu hauonekani tu katika mambo makubwa. Mara nyingi hujidhihirisha kwenye mambo madogo ya kila siku. Jiulize:

• Je, ninapotumia muda wa watu wengine, naheshimu muda huo?

• Je, ninaposema nitarudi au kufika mahali fulani kwa wakati, kweli nafanya hivyo?

• Nikipewa jukumu, je, nalitekeleza hata nisiposimamiwa?

• Je, ninapoomba msaada au mkopo, hurejesha kwa wakati kama nilivyoahidi?

Haya mambo huonekana kuwa kama madogo, lakini ndiyo yanayojenga au kubomoa jina lako kabisa. Katika ulimwengu wa sasa, jina lako linaweza kuwa “kadi ya kuingilia” kwenye milango mingine mingi, au ukuta unaokuzuia kupita.

Neno la Mungu Linasemaje kuhusu uaminifu?

“Mtu mwaminifu atapata baraka nyingi, bali mwenye haraka kutajirika hataachwa bila adhabu.”
— Mithali 28:20

Biblia haitufundishi tu kuwa waaminifu kwa Mungu, bali pia kwa wanadamu. Ni kinyume cha kanuni ya ki-Mungu kujaribu kuwa mwaminifu kwa Mungu bila kuwa mwaminifu kwa Mungu. Mtu mwaminifu hupata baraka nyingi—baraka ambazo wakati mwingine si za pesa tu, bali za amani ya moyo, heshima, mahusiano mazuri, na fursa zisizotarajiwa. Maisha haya si mbio za haraka bali ni safari ndefu inayohitaji tabia imara kama uaminifu.

Matunda Makuu ya Uaminifu kwa Wengine

Uaminifu si tu wajibu wa kiroho au kimaadili—ni mbegu ya mafanikio. Na kila mbegu inapoanguka kwenye udongo mzuri, huzaa matunda. Haya hapa ni baadhi ya matunda hayo:

1. Heshima ya Kudumu

Uaminifu hukujengea wewe jina la heshima, hata kama watu hawakupendi au hawakuelewi. Wataweza kusema, “Simuelewi huyu mtu, lakini ni wa kweli. Ana msimamo wake.” Heshima ya kweli haiji kwa kujikweza au kulazimisha, bali kwa kuishi kwa uaminifu siku baada ya siku. Hata ukiwa kimya, tabia zako huongea kwa sauti kubwa.

2. Ushirikiano Imara

Watu wanapenda kushirikiana na wale wanaoweza kuwaamini. Katika biashara, familia, au huduma, au maisha kwa ujumlahakuna anayependa kushirikiana na mtu ambaye kila wakati unajiuliza: “Je, atanizunguka?” Uaminifu hujenga daraja la ushirikiano linalodumu. Unapokuwa mwaminifu, unavutia watu wenye tabia kama yako—wenye thamani kubwa maishani.

3. Fursa Zinazojitokeza

Mara nyingi, watu waaminifu hupewa nafasi hata pasipo kuomba. Mtu aliyewahi kushirikiana nawe na ukaonyesha uaminifu, huweza kukukumbuka miaka mingi baadaye na kusema, “Ninamhitaji yule kijana/ dada/ kaka/ bosi aliyekuwa mwaminifu.” Fursa nyingi hutembea kimya kimya, zikimtafuta mtu mwenye jina la kutegemewa.

4. Amani na uhuru wa Ndani

Uaminifu huondoa mzigo wa kujificha au kuishi maisha ya kujitetea. Mtu mwaminifu hulala kwa amani kwa sababu hana cha kuficha, hana aliyemdhulumu, na hana hofu ya jambo litakalofichuka. Amani hiyo ni zawadi ya kipekee isiyouzwa sokoni. Uaminifu ni njia ya uhuru wa nafsi.

Hebu Jiulize...

• Je, jina langu linahusishwa na uaminifu au ujanja ujanja?

• Kuna watu waliowahi kuniamini, nikawavunja moyo? Je, nimewahi kuomba msamaha?

• Je, kuna mtu anapitia changamoto leo kwa sababu ya kutokuaminika kwangu?

Uaminifu hauhitaji ushuhuda wa watu elfu moja. Unaweza kuanza leo, na hatua kwa hatua, watu wataona tofauti.

Jenga Jina Lako kwa Maisha Yako

Uaminifu kwa watu wengine ni zawadi unayojipa wewe mwenyewe na kizazi chako. Unapojenga tabia hii, unajijengea jina litakalokutangulia hata unapokuwa mbali. Katika dunia ya leo yenye kelele nyingi na watu wa kujifanya, kuwa mtu wa kweli ni utajiri wa kipekee. Jitahidi kuandika jina lako vizuri kwa kalamu na wino wa uaminifu ili utakapokuwa haul duniani iwaki watu wanakusoma. Chukua hatua leo: Usiishi kwa kujitetea au kujaribu kuonyesha usiyoyafanya. Ishii kwa ukweli. Maisha yako yatashuhudia tabia zako.

Endelea kufuatilia mfululizo huu wa makala 10 kuhusu NGUVU YA UAMINIFU. Makala inayofuata:
Uaminifu Kwa Malengo Yako: Je, Wewe Ni Mwaminifu Kwa Ahadi Ulizojiwekea?
Naamini utakuwa umepata kitu kupitia  makala hii fupi. Ukiwa na uhitaji wowote au ushauri katika eneo lolote la kuboresha maisha yako usisite kuwasili nasi kupitia njia za mawasiliano hapo chini. Aidha kwa kutuma ujumbe mfupi wa maneno, whatsapp kupiga simu au kututumia barua pepe nasi tutarudi kwako mapema iwezekanavyo. 
Ni mimi kocha na rafiki yako Philipo Lulale
WhatsApp: +2557845076
Barua pepe: maishanifursa2017@gmail.